Rýdnyı qalasynda Táýelsizdik alǵan jyldardan beri birinshi ret 60 páterlik eki jańa úı tapsyryldy. Bul arendalyq baspanalardy qalalyq ákimdikte páter kezeginde turǵandar aldy. Onyń kiltin oblys ákimi Arhımed Muhambetov ózi kelip tapsyrdy.
«Rýdnyı qalasyn kórkeıtý úshin bıýdjetten kóp qarjy jumsalýda. Jańa úıler salýmen qatar, aldaǵy jyly eski úılerdiń syrtyn jóndeıtin bolamyz» dedi Arhımed Begejanuly.
Kenshiler qalasynda salynǵan eki úıdiń ınfraqurylymy úshin bıýdjetten «Nurly jer» baǵdarlamasy boıynsha bir mıllıard teńgeden asa qarjy bólindi.
«Bul úılerge áleýmettik az qorǵalǵan turǵyndar kiretin bolady. Olar zeınetkerler, jetim balalar, tolyq emes otbasylar, múgedekter, kóp balaly otbasylar men múgedek balalar asyrap otyrǵan ata-analar» dedi qala ákimininiń orynbasary Elena Skaredına.
Aldaǵy jyly qaladaǵy parkte Rýdnyıdyń tóńiregin bıikten túgel kóretin dıametri 40 metrlik sholý dóńgelegi salynatyn bolady.
Názıra Járimbet
«Egemen Qazaqstan»
Rýdnyı